Pénsote,
pénsote, cos teus rizos opacos rompendo no aire
a harmonía do azul infinito,
de novo, ceo e terra só un.
Un un, crebado pola túa figura. Túa figura núa, redondeada
dando toques de cor na area branca,
[ausencia
ou composición de toda cor]
Toques de verde,
verde ordenado, entre vermellos
e lilas,
na escala cromática que ti escolliches.
Toques verdes, que nun fondo negro
dan vida a peixes,
peixes
que nadan rápido tralo contacto da túa mau sobre eles.
Composición perfecta baixo a túa ollada,
diante das Cíes,
que rompen a liña do horizonte,
Ben me gustaría que me
pintases
e ser, aínda que en proxecto de min mesma,
a que está baixo túa ollada,
á que acarician, dando cor, as túas maus
A miña mente salta e brinca divertida
entre os teus debuxos
e os teus senos
imaxinando seu contacto…cos meus.
Imaxinando
o noso encontro
húmido
e prohibido entre
humidades
Nunca
imaxinadas, sempre
afundidas
no limbo das cousas que
non
ocorren,
non se nos ocorren.
Alicia Piñeiro
Ningún comentario:
Publicar un comentario